ТОВЧ ТҮҮХ
Монголын Хүүхдийн Урлан Бүтээх төв нь Монгол Улсын Ардын багш, шилдэг зохион бүтээгч, хүндэт доктор, профессор Бавуугийн Цэрэндоржийн санаачилгаар, БНМАУ-ын сайд нарын зөвлөлийн 1988 оны 9-р сарын 01-ны өдрийн 216 дугаар тогтоолоор пионер сурагчдад хөдөлмөрийн хүмүүжил, мэргэжлийн чиг баримжаа олгох, тэдний зохион бүтээх, урлах авьяас чадварыг хөгжүүлэх зорилгоор “Пионер сурагчдын сургалт үйлдвэрлэлийн төв” нэртэйгээр анх байгуулагдаж, үйл ажиллагаагаа явуулж эхэлсэн. Шинэ Үндсэн хууль батлагдсантай холбогдуулан 1993 онд Монголын Хүүхдийн Урлан Бүтээх төв нэртэй болж, одоог хүртэл хүүхэд багачуудын авьяас чадварыг хөгжүүлэх, чөлөөт цагийг үр дүнтэй өнгөрүүлэх, амьжиргааны арга ухаанд сургах, мэргэжлийн чиг баримжаа, хөдөлмөр гоо зүйн хүмүүжил олгох зорилгоор дүрслэх урлаг, техник технологийн чиглэлээр сургалт явуулж, нийт 10000 гаруй хүүхэд багачуудыг өөрсдийн хүсэл сонирхлынх нь дагуу зохих мэдлэг, чадварыг эзэмшүүлж, сурган төгсгөөд байна.
Манай төвийн барилга нь анх 1958 онд ахмад архитектурч Б. Дамбийнямын хосгүй гайхамшигт зураг төслөөр баригдсан барилга бөгөөд сонгодог архитекторын шийдэл бүхий түүх соёлын бахархалт өв тул гадаадын зочид төлөөлөгчдийн заавал сонирхож үзэх газрын нэг билээ. Төр, олон нийтийн зүтгэлтэн, гадаад орны зочид төлөөлөгчид хүрэлцэн ирж, зохион байгуулагдаж буй үзэсгэлэн уралдаан, хийсэн уран бүтээлийг нь үзэж, монгол хүүхдийн авьяас чадвар, нөөц бололцоо, ур ухааныг гайхан биширдэг.
Иймд бид Монгол улсын ирээдүй болсон хүүхэд багачуудынхаа хөгжлийг дэмжиж, тэдний авьяас чадварыг нээн хөгжүүлэх, зөв чиглүүлэх, арга техникт сургах замаар мэргэжлийн чиг баримжаа олгож, өв соёлоо дээдэлдэг бүтээлч монгол хүүхэд бүрийн төлөө хичээн ажиллаж байна.
ҮНДСЭН ҮЙЛЧИЛГЭЭ
Монголын Хүүхдийн Урлан Бүтээх төв нь хүүхэд багачуудыг мэргэжлийн чиг баримжаатай болгох, тодорхой түвшний мэдлэг, ур чадварыг эзэмшүүлэн өөрийн орны болон дэлхийн урлаг, соёлын өв уламжлал, шинжлэх ухаан, техникийн орчин үеийн дэвшилтэт технологид суурилсан гар урлал, техникийн, оюуны бүтээл туурвих хүсэл эрмэлзэл, чадвартай болгох зорилгоор дараах сургалтуудыг ҮНЭ ТӨЛБӨРГҮЙ явуулж байна. Үүнд:
- Уран зургийн анхан шат 2 анги
- Сүрлэн сүлжмэл, гар урлалын анхан шат 1 анги
- Хүүхэлдэй бэлэг дурсгалын анхан шат 1 анги
- Монгол уран бичлэгийн анхан шат 1 анги
- Гар урлалын анхан шат 1 анги
- Уран баримлын анхан шат 1 анги
- Уран зураг 3 анги
- Хүүхэлдэй, бэлэг дурсгал 2 анги
- Хувцас загвар 1 анги
- Сүрлэн сүлжмэл 1 анги
- Сүрлэн наамал 1 анги
- Уран баримал 1 анги
- Уран хайчилбар 1 анги
- Арьсан урлал 1 анги
- Чимэглэлийн уран зураг 1 анги
- Барилгын макет, дизайн 1 анги
- Монгол уран бичлэг 1 анги
- Уран сийлбэр 1 анги
- Монгол зургийн анги 1 анги
- Монгол хувцас загварын анги 1 анги
- Үндэсний уламжлалт уран хатгамал 1 анги